Here some brothers and sisters have written about their encounters with God. God had mercy on them, forgave their sins and made them free.
Фькьред шаш мәрьв пашда дьбьн, фькьред р’аст... зәʼфтьр...
Ч'еләка сор зәʼфтьр...
Иса гәло т'әне Хwәйе Әрмәнийа йә? зәʼфтьр...
һ'ьзкьрьна Хwәде нав мьнда гәләк бу зәʼфтьр...
Mьн гәләк ломә дькьр зәʼфтьр...
Мьн гəлəк дьхwəст бьдита, хwəденас чь дькьн зәʼфтьр...
Нәчә хwәденасийе! зәʼфтьр...
Гәло Хwәде һәйә йан на? зәʼфтьр...
Mьн хәwнеда Иса дит зәʼфтьр...
Хwәде рʼастийа Хwә мәрʼа вәкьрийә зәʼфтьр...
Әз тәʼл нәхwәш бум зәʼфтьр...
Мьн фәʼм нәдькьр, хwәденаси чь йә зәʼфтьр...
Щарәке мьн дьхwәст хwәха хwә бькӧшта зәʼфтьр...
Фькьред шаш мәрьв пашда дьбьн, фькьред р’аст мәрьв пешда дьбьн - жь бьрайе Б.
Жь зар’октийа мьн һ’әта әз бумә 27 сали мьн т’ьме дьгот: «Әз нава Әрмәнийада дьжим, әз Әрмәни заньм, Р’уси жи п’ьр’ һьндьки заньм, чи мьнр’а йә, әз зьмане xwә һин бьм йан бьхунм? Чьмки wәлате мьн т’öнә, нә жи лазьм ә әз һин бьм.» Бь ван фькьред шаш әз дьшьрмиш дьбум. Ле шькьр Хwәдер’а, чахе әз вәгәр’ийа мә бәрбь Хwәде, мьн фә’м кьр, һәгәр Хwәде әв зьман дайә мьн, әз гәрәке зьмане де бьхуньм һин бьм.
Фьрqи т’öнә, тö к’ö дьмини, һәр мьләт гәрәке зьмане хwә хәбәр дә у бьхунә. Ньһа шькьр Хwәдер’а әз зьмане хwә дьхуньм, дьньвисьм у Мьзгинийе дьхуньм у нава мала хwәда бь зьмане хwә хәбәр дьдьм. Öса жи зар’ед мьн бь зьмане К’öрди хәбәр дьдьн. Әз жь Хwәде р’ази мә, wәки фькьред р’аст да мьн у әз гәлә ша мә, wәки К’öрд ьм.
Әва шә’дәти бона wан мәрьва йә йед кö мьләте хwә һ’ьз дькьн. Гәрәке әw шәрм нәкьн, бь зьмане хwә хәбәр дьн у бьньвисьн, бона к’ара wан у мьләт.
Ч'еләка сор ч'әрме хwә нагöһезә? жь бьрайе С.
Әз сала 1952-да, ль Әрменьстане һатә дьнә. Әз мәк’тәбеда р’ьнд һин бумә. Сала 1971-1973-да әз чумә әскәрийе, мьн qöльх кьрийә. 1974-да әз һин бумә сәр дәрсе клубе у бумә сәрwере клубе. Öса жи бона хәбата дьк’ане әз шәш мәһа һин бумә, паше дьк’анеда хәбьтимә. Пәйр’а жи саләки әз хәбьтимә сәр щабдарийа бензине, ньфте у һ’әму п’арчед тәхникайе. Чь кö гöндр’а лазьм бу мьн гәләк һ’ьз дькьр бькьра. Ле мьн гәләки ә’мьре хwәда ич’кә (алqол) һ’ьз дькьр.
Сала 1990-да гöнде мәда хwәденасити һәбу. Де у баве мьн дьхwәстьн, wәки әз ич’ке дур к’әвьм у бона ве йәке бьбьмә хwәденас. Ле мала мәда т’ьме ич’ке һәбу. Һ’әта мьн 100-грам вәнәхwара, мьн нькарьбу нан бьхwара, һаqаси бьбумә qуле ич’ке. Мьн щаба де-баве хwә дьда дьгот: «Мьн чь кьрийә, wәки бьбьм хwәденас? Әз хьрабийә накьм, шәр’уд ниньм, хенщи qәнщийе т’ö кәсир’а хьрабийе накьм, бона чь бьбьмә хwәденас? Бьра бьбьн хwәденас әw мәрьв: к’е зьни кьрийә, к’е мәрьв кöштийә, к’е ч’ә’ва wи сәр хьрабийе йә. Ле мьн чь кьрийә? Хәйсәте мьнда т’әне әw хьраб ә, wәки ич’ке гәләки һ’ьз дькьм.»
Паше кәсәки мьнр’а тьштәк нәгот, ле әз дьле хwәда шеwьрим. Мьн гот: «Әз һәр’ьмә нава wан, бьньһер’ьм хwәденасити гәло чи йә, чь дьбежьн, чь qәwат ә? Иса к’и йә? Ниве гöндийа жи дьготьн, wәки Езьди чунә сәр дине Фьла.»
Хwәденаса пе стьрана шькьри дьданә Хwәде, гәләк дьле мьн һат, даннасин кьрьн, ле мьн т’ö qәwат нәдьстанд. Ле wәхте дöа кьрьн, qәwатәкә мәзьн пәйайи сәр мьн бу. Дöа хьлаз бу, фькьр һатә мьн: «Әзе wанрʼа бежьм, к’а әw дәфтәра Хwәде бьдьнә мьн. Әз сонд бьхwьм, бежьм, wәки сьбе р’ожа мәзәлед мә йә, сьбеда әз ида ич’ке надьмә дәве хwә». Ле әз шькеда бум, хwәха хwәр’а дьбежьм: «Тӧ чь дьки? Нә тә Хwәде нас кьрийә, нә жи тö хәбәра Хwәде зани.»
Әзе ньһа бьньвисьм чаwа әз бумә хwәденас. Сала 1992-а мәһа Һәзиранеда ме мина һәр гав хwәст кӧ һәрʼьнә сәр мәзәла. Баве мьн чу бажаре незьк, чу wәки п’оре хwә серәк кә. Һәр дö щи жи дадайи бун. Һатә мале готә мьн: «Һәрә бежә щинаре мә бе, п’оре мьн серәк кә, wәки әз т’әмьз һәр’ьмә сәр мәзала». Әз чум, wе дәqе жь бажарәке дьн хwәденас һатьбун мала wи. Мьн хwәха пьрс да хwә: «Йәк ә, әз найемә гöһастьмә, кал-бавед мә жи дьбежьн wәки челәка сор ч’әрме хwә нагöһезә. Мәрьве хәйсәте хьраб хwәха хwә нькарә бьгöһезә. Ле Хwәде лапи кʼар ә. Исайе Нурани пе Нур-нәдәра Хwәва мәрьва дькарә бьгöһезә, һәгәр мәрьв хwәха бьхwазә.» Бьра мубәрк’ бә нав-дәнге Wийи мубәрк’!
Щьвин хьлаз бу, щинаре мә һат мала мә, п’оре баве мьн да серәккьрьне. Паше апе мьн, мәта мьн нан данин готьнә мьн: «Wәрә, әм нан бьхwьн, касәкә ич’ке вәхwә.» Мьн нан хwар, ле ич’кә вәнәхwар. Мал гәләк ә’щебмайи ма, wәки әз ич’ке нахwазьм. Wе р’оже, чаwа ич’кә сәре мәрьв гәләки дьгьрә, әз жи öса пе qәwата Хwәде һатьбумә гьртьне. Сьбәтьре әм чунә сәр мәзәла, ве рʼоже әз гәрәке ә’сә пийан (сәрхwәш) бума, ле ида әw ммәрьв нибум. Иса әw тамара ич’ке жь нава мьн да бьр’ине. Әм жь сәр мәзәла вәгәр’ийан һатьнә мале, т’әхтә данин ич’кә данин, готьн: «Вәхwә!», мьн гот: «На, әз ич’ке вәнахwьм.» Жь wе р’ожеда һ’әта иро 17 сал ьн, әз ич’ке дур ьм.
Щарәки жи т’әви һәвале мьн әм чунә бажарәки майин; щәм мә п’әрә һәбу. Һәвал готә мьн: «Әз тәр’а пиве (бире) бькʼьрʼьм, тö т’әви мьн вәхwә.» Кьр нәкьр мьн вәнәхwар, ле мьн щаба wи да у готе: «Ида әз хwәденас ьм, әз иди жь ич’ке дур ьм.» Ле мьн пешийа т’обәбуна хwә гәләк пивә һ’ьз дькьр. Әз гәләки жь Хwәде р’ази мә, wәки бумә хwәденас.
Челәка сор чәрме хwә нькарә бьгӧһезә жи, ле qәwата Хwәде дькарә мәрьва бьгӧһезә у wан аза бькә.
Иса гәло т'әне Хwәйе Әрмәнийа йә? жь хушка Q.
Әз сала 1941-да һатьмә дьне. Сала 1993-да мьн т’обә кьрийә. Мьн ә’мьре хwә дайә Хwәде у qәт п’ошман ниньм.
Ле әв чаwа бу? Малхе мьн 15 сала гьрти буйә. Чахе әw пәй гьртьнер’а һат, мьн һәла һе Хwәдейе хwә наз нәдькьр, ле Хwәде р’ә’ма хwә малхе мьнр’а кьр. Әwи хwәр’а р’ек дит чу щьватәке у щарәке мьнр’а гот: «Һәла тö жи wәрә щьвата мә, бьбинә чаwа баш ә». Мьн жи гот Исус йа Әрмәнийа йә. Әз найем… Паше мьн гот, әзе р’ожәке һәр’ьм бьньһер’ьм, әw чь иман ә. Хwәде р’ә’ма хwә кьр, рʼастийа Хwә мьнрʼа вәкьр. Әз чум ль wьр, әwе щьватеда әз саләке мам. Пәйр’а мьн бьһист, wәки мала хушка мьнда щьватәкә майин буйә. Әз т’әви кöр’е хwә чумә мала хушка хwә, ле һьнге дöдьли к’әтә нава мьн. К’ижан щьват бона мьн р’аст ә йан на? Мьн дöа кьр, һьнәк wәхт дарбаз бу, бәр мьн тьштәк вәнәдьбу. Ле шәвәке мьн хәwн дит, к’идәре мьнр’а к’ьвш бу, wәки әз wе щьватеда бьминьм.
Иса ә’мре мьнда чь к’әрәмәт кьрийә? Сала 2008-а сьсейе Илоне әз гәләки нәхwәш бумә. Малхе мале баwар нәдәкьр. Бу евар, малхе мале р’азайи бу, ле әз р’анәзам. Әз һәма öса чәрчьримә р’анәзам. Сьһ’әт бу ниве пенща һʼале мьн гәләки хьраб бум, ида ньзаньм чаwа бьк’әвьм сәр щи-ньвине. Хöдан дәнгәки öса чекьр, мина кӧ шуше балконе т’әмам дьшкенә у кәсәки qайим дәри дьхә. Малхе мале һ’ьшйар дьбә, дьчә һәрә дәри вәкә, т’ö кәс бәр дәри набинә. Саw дьк’әвә сәр, пашда вәдьгәр’ә, те щәм мьн, дьньһер’ә, wәки әз к’әтьмә сәр ньвина. Әз һ’ьшйар кьрьм, чу балконе ньһер’и, ле шушә нәшкәстьнә, гьшк щида нә. Һьнге малхе мале мьнр’а гот: «Р’асти жи Хwәдейе тә сах е, wәки әз һ’ьшйар кьрьм у тö нәмьри йи». Шькьр Хwәдер’а wәки һәр т’ьм т’әви әwләдед Хwә йә.
Иди 16 салед мьн ә, әз сәр wе р’е мә. Шькьр бә жь Хwәдер’а, wәки р’ийа р’аст нишани мьн кьр. Һ’әта ньһа әз у кöр’е хwә һәрдӧ сәр wе р’е нә. Әз гәләк жь Исайе хwә р’ази мә, wәки бона мьн хуна Хwә р’етийә у ч’ә’ве р’öһ’е мьн вәкьрийә: wәки әз Wи нас кьм, чаwа Хöдан Хwәдайе хwә, Хьлазьк’аре хwә у гöмана сәр дьле хwә.
һ'ьзкьрьна Хwәде нав мьнда гәләк бу - жь хушка Q.
Әз сала 1939-а Әрменьстанеда һатьмә дьне. Чумә мәк’тәбе һ’әта к’ома дöда, пәйр’а дайика мьн ч’әʼвада кор бу. Баве мьн нәһьшт әз һәр’ьмә мәк’тәбе, чьмки нәфәред мала баве мьн гьран бун. Әм пенщ хушк у пенщ бьра бун. Зар’отийа мьн гәлә зәлули дәрбаз бу, чьмки т’әмамийа хәбата гьран к’әтә стуйе мьн. 15 салийеда баве мьн әз дамә мер. Гәләк wәхт зар’ед мьн т’öнә бун, паше чумә сәр к’оч’әк у мола. Мьнр’а бәньк кьрьн, wәки зар’ед мьн һәбьн. Паше мьнр’а зар’ бу, ле wәфат бу, öса жи се зар’ед мьн wәфат бун. Пәй ве йәкер’а чар кöр’ у qьсәкә мьнр’а бун.
Әз гәләк ньһа п’ошман бумә, wәки мьн Хwәде наснәкьрийә у чумә бал к’оч’әк у мола. Мьн ньзанбу хwәденаси чи йә, хушкәк жь бажер һатьбу гöнд у мьн жь wе хәбәра Хwәде бьһист. Мьн сала 1991-еда хәбәра Хwәде qәбул кьр. Пәй ве йәкер’а мьн әw бәньк авитьнә аве. У һьнге һ’öб у һʼьзкьрьна Хwәде нав мьнда гәләк бу.
Шькьр Хwәдер’а, wәки ньһа нәфәред мала мьн сәр р’ийа Хwәде дьчьн. Гәләк сал дәрбаз бун, пенщ бьред мьн wәфат бун. Хwәде һаqас qәwат да мьн, wәки паши мьрьна бьрайед мьн диса мьн Хwәде бәрнәда. Һ'әта иро жи әз пәй Хwәдейе хwә дьчьм, чьмки т'әне Әw дьлбьнийе у qәwате дьдә мерьв.
Mьн гәләк ломә дькьр - жь хушка Б.
Әз дьхwазьм wәрʼа бежьм, мьн чаwа Хwәде нас кьрийә. Гöнде мәда щьмә’т дьчу щьвата хwәденасийе. Ле мьн жи гәләк ломә дькьр, пәй wанар’а хәбәред нә баш дьготьн. Ле мьн нава wанда һ’ьзкьрьн у т’ьфаq дьдит. Т’әвгьредана wан т’ьме т’әви-һәв һәбу.
Р’ожәке бьраки жь хwәденаса готьбу хасйиа мьн: «Бука тә у кöр’е тә чьма найенә щьвате?» Хасийа мьн гот: «Һәр’ә щьвата wан, паше жи wәрә мәр’а бежә.» Әз чум, ле әз чубум бона лома у qәрфа. Мьн ньзаньбу, wәки әв шьхӧле Хöдан ә, дьхwазә гази мьн кә. Әз чум, һәр тьшт зә’ф баш бу. Щьмә’те пәсьне Хöдан дьдан, стьранед р’öһ’ани дьстьран, ша дьбун, жь хәме дьне qәтийайи дöа дькьрьн. Мьн жи дöа кьр. Wе дәме ешәкә зә’ф гьран к’әтә сәре мьн. Мьн нькарьбу сәре хwә бьлнд кьра. Һьнге мьн фәʼм кьр, кӧ әв бона ломәкьрьна мьн бу - у мьн тʼобә кьр.
Пәй wе йәкер’а әз ида Хöдане хwә нәqәтийам, чьмки мьн фә’м кьр: Т’әне бь наве Иса Мәсиһ хьлазбун һәйә. Һ’әбандьн тʼәне п’ара Хwәде йә. Шькьр бә һәр се навед Wир’а Бав, Кöр’, Р’öһ’е Пирозр’а, Амин!
Мьн гəлəк дьхwəст бьдита, хwəденас чь дькьн - жь хушка Г.
Әз сала 1958-a һатьмә дьне у бажаре Тилбьседа мәзьн бумә. Сала 1995-да мьн Хwәдәйе хwә нас кьрийә у т’обә кьрийә. Һьнгева т’әмамийа ә’мьре хwә сәр Wи фькьри мә.
Жь к’ома пенща һ’әта кʼома дәһа әз чумә спорте. Мьн р’ьм давит. Әз мәк’тәбе у öса жи спорте жи р’ьнд һин бум. Чахе әз бумә шанздәһ сали, ида әз дьбьрьмә бажарәки дьн. Паше әз чумә Литәвайе, Әстонийайе, Рʼусйайе, Казахстане, Әрменьстане. Wан wәлатада мьн щийе пешьн гьрт у дö һ’әб медалед зер’ диплом стандьн - у зә’ф ша бум.
Щаһьлти гәләки хwәш ә, ле зу wә’дә дәрбаз дьбә. Хортәки гöнд жь Әрменьстане һат, әз хwәстьм у нишан кьрьм. Баве мьн нәдьхwәст, wәки әз ль wе дәре мер кьм. Ле һьлбәт йазийа мьн вьра к’әт. Ньһа әз дьминьм Әрменьстане. Ле ә’мьре гöндийа мьнр’а чәтьн бу, мьн гәләк щәфа дит. Се qизьк мәзьн кьрьн, данә мер. Хwәде зар’ данә wан, малед баш, меред баш. Хwәде дәһә нәби п’ешк’еши мьн кьрьнә.
Ле шабуна ве дьнайайе тьштәки бош у бәтал ә. Чар дәрба әз к’әтьмә бьне операси. Ньһа әз һьнәки сьст ьм.
Сала 1995-да мала щинаре мәда хwәденас дәстпекьрьн т’оп дьбун. Мьн т’ьме әw дьдитьн, чахе бәр дәре мала мәр’а дәрбаз дьбун. Мьн гәләк дьхwәст бьдита, хwәденас чь дькьн. Хwәде р’ә’ма Хwә кьр у гöнде мәда маләкеда щьвата хwәденаса вәбу. Щарәке әз чумә wе дәре. Мьн дит, wәки бона Хәбәра Хwәде гьли дькьн у әw Хәбәр к’әт дьле мьн. У мьн һ’ьз кьр, wәки т’ьме һәр’ьмә щьвате.
Wе сале әз бумә хwәденас, әз к’әтьмә нава щер’ьбандьне: Әз диса операси кьрьм. Хwәсийа мьн нәдьһьшт, wәки әз һәр’ьмә щьвате. Дьготә кöр’е хwә: «Тӧ дьбини, Гöһар бу хwәденас, ләма һ’әму тәнгаси һатә сәре мала мә. У хwәха к’әтә бьне опәрасийайе.» Ле малхе мьн мьнр’а һ’әйф бу.
Әз гәләки ша мә, wәки мьн азабуна р’öһ’е хwә дитийә нава Исайе Хwәдейе хwәда. Бейи Хwәде әм мьри нә у чаwа пәзе бе шьван хальфи нә. Әз гәләк һ’ьз дькьм Исайе хwә у р’ази мә жь Wи, wәки иро әз пәй Wи дьчьм. Әwи ч’ә’ве р’öһ’е мьн вәкьрийә. Әз жь wи Исайе хwә р’ази мә бона һ’ьзкьрьна Wийә мәзьн, бона хуна Wийә пироз, wәки р’ет бона мьн.
Шькьр жь Хwәдер’а, әз р’ази мә жь Хwәде, wәки шьватәк дайә мә. Шьванәки амьн щәм мә һәйә. Чь пьрсед мә жь К’ьтеба Пироз һәбьн, әм wи дьпьрсьн. Чь жи әм ньзаньн, әw мә һин дькә.
Һивийа мьн әв ә, wәки Хwәде мьләте мә у һ’әму мәрьва бе р’ә’ме, чаwа мьн һатә р’ә’ме. Бьра т’ö р’öһ’е мәрьва щәм Wи öнда нәбә. Шькьр жь Хwәдер’а һ’әта-һ’әтайе. Амин.
Иса Хöдан Хwәйе мьн - жь Г.
1. Иса Хöдан Хwәйе мьн,
Тö ә’мьре мьни ширьн.
Чь бькьм әз ньзаньм
Wәки бем щәм Тә һеса бьм.
Иро дьле мьн дьхwазә
Р’аст бь иман бем щәм Тә.
Бейи Тә нькарьм бьжим.
Дьле мьн т’ьм т’әви Тә. (2)
2. Хwәде дьбежә бьхунә,
Ә’мьре тә жи щәм Мьн ә.
Wәки р’аст бейи, те хьлази би,
Чап һәри те öнда би.
Иса дöайе Хwә мьн кә,
Wәки зу әз бем щәм Тә.
Бьжим т’ьме т’әви Тә,
Бьбиньм һ’ьзкьрьна Тә.(2)
3. Тö чьqаси мәзьн и,
Һаqас жи Тö пироз и.
Т’ьме бьстьрем сәва Тә
У бьльнд кьм наве Тә.
Иса тö йи Хwәйе мьн,
Р’е у р’астийа ә’мьре мьн.
Бейи Тә нькарьм р'е һәр'ьм,
Тö йи шьване ә’мьре мьн. (2) (Хушка Г. бьһара сала 2012-да чу рʼәʼме.)
Нәчә хwәденасийе! жь хушка Q.
Әз сала 1962-а жь дийа хwә бумә у Әрменьстанеда мәзьн бумә. Мьн 28 салийа хwәда мер кьрийе. Сала 1994-да мьн Хwәде qәбул кьрийә чаwа Хwәйи у Хьлазк'аре хwә.
Гава мьн Хәбәра Хwәде бьһист, дьле мьн к'әт. Һьнге хәзуре мьн гәләки мьн дьзер'анд дьгот: «Нәчә хwәденасийе!». Ле мьн ширьнайа Хwәде дитьбу, әз нькарьбум жь Хwәде бьqәтийама. У шькьр бә наве Хwәдер'а, wәки әз һʼәта иро зар'а Wи мә - у Әw Баве мьни әʼзмана йә. Әwи гәләк шабун, һ'зкьрьн, дьлбини у сәбьр дайе мьн у гәләк к'әрәмәт нав ә'мре мьнда кьрийә. 22 сал ә зар'окед мьн т'öнә нә. Пе сәбьра Wи әз дьжим, чьмки Хwәде рʼәʼм ә.
Бәле, әз шькьрийа хwә тиньмә Хwәде жь ә'рд һ'ә'та ә'змен, чьмки Хwәде нава мьләте мәда ә'мьрәки ну дайә. АМИН
Гәло Хwәде һәйә йан на? жь хушка З.
Әз һе зарʼотийа хwәда зәʼф дьфькьрим: «Гәло Хwәде һәйә йан на?» Әз дьшьрмиш дьбум, гәло кʼе чекьр әʼрд у әʼзман? Мьн заньбу, wәки qәwатәк тьштәк һәйә - у әз зәʼф мьрьне дьтьрсийам, жь тәʼрийе дьтьрсийам, жь мәрийа жи дьтьрсийам. У мина һʼәму бәнде ве дьне, мьн жи дьжит нава гӧна у хьрабийеда.
Щарәке кӧрʼе балтуза мьн, кʼижан wи чахи 17 сали бу, һатә мала мә. Чахе мьн әw дит, әʼмре wи, рʼабун-рʼуньштандьна wи дит, әз әʼщебмайи мам. Те бежи әwе бәре чуйә у йәки майин һатә дәwсе. Жь хәбәрдана ви щаһьли, жь дәве wи гул-нурʼа Хwәде дьбари. Мьн пьрси: «Әв чь әʼщеб ә тʼәв тә qәwьмийә?» Әwи гот, wәки Хwәде әw гӧһастийә у дәстпекьр Хәбәра Хwәде мьнрʼа хwәнд, хwәнд у шьровә кьр.
Мьн щара әʼwльн бьһист, wәки Хwәдейе рʼаст һәйә - у Әw нә дур ә, ле тʼәв мә йә. Хwәде Рʼӧһʼ ә у гәләк мә һʼьз дькә. Ләма Әwи Иса Мәсиһ шандә ве дьне. (Мәтта 3:16-17) Иса бе гӧнә бу, ле гӧнед мә һьлда сәр Хwә, wәки әм хьлаз бьн. Һәр кәсе кӧ Wи баwәр бькә ӧнда набә, ле жийина һʼәта-һʼәтайе wе бьстинә. У һесьрбун чʼәʼве мьн дьһатьн. Мьн дьле хwәда баwәрийа хwә Иса ани.
Пәйрʼа чахе тʼәне мам, мьн чок да у дӧа кьр. Мьн гази Хwәде кьр, wәки бьбахшинә һʼәму гӧнед мьн. Кӧрʼе балтуза мьн пәйрʼа се рʼожа гәләк тьшт мьнрʼа гьли кьр у чу бажаре хwә. Ле гәләк пьрсед мьн һәбун. Мьн дәстпекьр, кӧ Кʼьтеба Пирозда бьхуньм. Пәй ве йәкерʼа мьн те дәрхьст, wәки фькьред мьн һатьнә гӧһастьне, ӧса жи зьмане мьн тʼәмьз буйә жь гьлийе хьраб.
Щәм мә хwәденас тʼӧнә бун. Мьн тʼәне Мьзгини дьхwәнд у дӧа дькьр. Ле пәй дәмәкерʼа әз рʼӧһʼани гәләк сьст бум. Дьжмьне рʼӧһʼе инсен жи һʼәму тьшти дькә, wәки мәрьве ӧса бәрбь хwә бькʼьшинә. Мьн һе һәвәк Хәбәра Хwәде нәдьхwәнд, әwи хәwәкә кʼур у ширьн дькьрә чʼәʼвед мьн, wәки нәхуньм. У һеди-һеди мьн нәдьхwәнд, мьн те дәрнәхьст, ча рʼӧһʼани ведьсьм. Ле Хwәде зәʼф мьн һʼьз дькә у чаwа бав мьqати зарʼа хwә йә, Әwи жи әз нәһьштьм. Зарʼа нас кӧ гӧрʼа баве хwә накә, бав жи щарна һерс дькʼәвә у шәмаке рʼуйе зарʼа хwә дьхә, wәки бьсәкьнә у вәгәрʼә. Ӧса жи Хwәде шәмака мәзьн мьн хьст у чар сала әз нава агьрда дәрбаз кьрьм. Шькьри наве Wирʼа, бь ви агьри әз тʼәмьз дькьрьм у незики Хwә кьр. Мьн нава wан щерʼьбандьнада пеша wи гьрт у гот: «Хӧдан, әз тә бәрʼнадьм. Һәгәр бьмьрьм, йа Тә мә, бьжим йа Тә мә.»
Әз дьгәрʼийам щьвине хwәденаса. Әз зәʼф тʼи бум сәва Хәбәра Хwәде. Хӧдан дьбежә: «Бьгәрʼьн у һуне бьбиньн.» Әз зәʼф гәрʼийам у шькьр наве Хwәдерʼа, мьн дит мала дӧа, кʼидәре щьмәʼта Хwәде тʼоп дьбә. Әз шабуна дьгьрийам. Мьн нәдьхwәст вәгәрʼийама мала хwә. Шькьр Исарʼа әз рʼӧһʼани тʼьжи бум. Хwәде әз рʼакьрьм сәр пʼийа, һәсьред мьн тʼәмьз кьр, дьле мьн дәрман кьр у шабуна Хwә да мьн. Әз пе аве имат бум у бумә нәфәра мала Wи. Пәйрʼа нәфәред мала мьн һатьнә щьвине.
Әз иро дьхwазьм тʼәмамийа дьнерʼа шәʼдәтийе бьдьм, wәки Әw ә канийа рʼәʼме, рʼийа рʼастийе. Әw ә Йе кӧ мьрьн алтʼ кьр у әз иро мьрьне натьрсьм. Чаwа мьн әʼмьре хwәда дитийә, жь наве Wи дьжмьн дьһʼәлә. Шькьр наве Исарʼа! Әwи бе зерʼ у зив әз аза кьрьм.
Иро нава мьләте мә мә һʼьз накьн, тʼуйи мә дькьн, мә беһӧрмәт дькьн гәләк щара. Дьбежьн: «Һун дине хwә дәркʼәтьнә, дине кал-бавед хwә. Ле әз ша мә, wәки Хwәде чʼәʼвед рʼӧһʼе мьн вәкьрийә. Мьн рʼасти у рʼонаһи дитийә.
Mьн хәwнеда Иса дит - жь xушка Н.
Әз ль wи чахи qиз бум, ижар мьн хәwнеда Иса дит. Мьн һьнге Иса дит, ле әз вәгәрʼийамә сәр мьле хwә. Мьн дьне ньһерʼи, ле мьн Иса qәбул нәкьр. Әз чумә дьне.
Паше һьнге мьн Иса нәдит. Мьн әw хәwна хwә кәсирʼа нәгот, wәки кәс ньзаньбә, тʼәне әз бьзаньбьм. Дәрбаз бу у пәй чар саларʼа мьн мер кьр. Гәләк щәфа мьн дьдит, гәләк дькʼәтьмә тәнгасийа, зәʼф дьчәрчьрим.
Паше зарʼок мьнрʼа бу. Зарʼока мьн qолайи бу. Мә бьрә нәхwәшхане. Доктор гот: «Әʼмьр накә, wе бьмьрә». Мьн wи чахи дӧа кьр у гот: «Хwәде, Иса, дьбежьн Тӧ Хwәде йи. Дә али мьн бькә! Бьра зарʼа мьн хьлаз бә.» Wи чахи рʼаст ә, мьн дьгот, ле мьн баwәр нәдькьр.
Паше һьнге диса мьн гәләк щәфа дит. Әw зарʼок һәма ӧса сәр пьште пʼак нәбу, ле дӧ сала сәр пьште дьжит. Wи чахи мьн тʼьме дьгот, wәки Хwәде һәйә, Әw чьма рʼӧһʼе зарʼоке һьлнадә? Чьма дьһелә зарʼок бьчәрчьрә? Диса ӧса, һәма ӧса щәфада, һәма ӧса нава тәнгасийада. Чьмки мьн Хwәде qәбул нәкьр? Ләма? Дәрбаз бу, ӧса жи зарʼок нәхwәш ма, дӧ сала әʼмьр кьр, паше мьр. Нәма.
Дәрбаз бу, wәкә дӧ сал се сал, мьн Иса һьнге диса дит. Иса диса гази мьн кьр, гот: «Wәрә wәрә, хwә хьлаз кә. Жь чәтьнайа, жь wан гӧна хьлаз би». Паше әз диса дӧдьли дьбум, ле әз һатьмә щьвине. Щарәк, щара дӧда һатьм, чум. У һьнге мьнрʼа вәбу: рʼасти жи, Хwәде гәләки ширьн ә. Ширьнайа Хwәде мәрьв тʼер набә. Ӧса иди әз һатьм, һәма ӧса әз һатьм; ча мьн дьхwәст әз бьһатама. Тʼьме һатьм чум, ӧса жи. Шькьр Хwәде, ньһа әз бумә хwәденас.
Рʼаст ә, зарʼока мьн мьр, ле шькьр Хwәде гӧмана мьн һәйә. Зарʼока мьн нәчуйә щәʼньме - чу щәм Иса. Әзе wәхтәки wе бьбиньм. Әз ньһа гәләк ша мә, wәки әз бумә хwәденас. Хwәдерʼа qӧльх дькьм, тʼәмьз. Щәфе мьн рʼаст ә һәйә, ле әw щәфа wәʼдәлу йә. Wәхтәки әме щәфа бьбиньн, ле хьлазбун һәйә мәрʼа. Әʼмьре һʼәта-һʼәтайе әме бьжин тʼәви Иса. Мала Wи ава бә, wәки әм дитьн. Хwәде тʼәви wә.
«Әм заньн кӧ һәр тьшт wанрʼа дьбьнә qәнщи йед кӧ Хwәде һʼьз дькьн». Рʼом. 8:28
Хwәде рʼастийа Хwә мәрʼа вәкьрийә - жь xушка Г.
Әз зәʼф ша дьбьм у бежьм, wәки Хwәде чь кʼәрәмәтәкә мәзьн мәрʼа кьрийә. Әз дьхwазьм бежьм, wәки һәр кәс бьзаньбә, wәки Мәсиһ чьqас Хӧданәки мәзьн ә.
Бәре йанздәһ сал пешда әм дьманә Әрмәнистане. Щарәке, дӧ щара, гава кӧлфәта хале мьн дьһатә меван, әwе мәрʼа тʼьме Кʼьтеба Хwәде дьхwәнд, Мьзгинийа Иса Мәсиһ. Дьхwәнд мәрʼа, ле мә тьшт фәʼм нәдькьр. Һәр щара мәрʼа дьгот. Мә дьготе, әв чь дьбежә? Әм тьштәки фәʼм накьн.
Ле щарәке жи мә перʼа соз да, мә гот wәки әме бенә щьвине щәм wә. Рʼожәке әз, малхе хwә, әм тʼәви һәв чунә щьвине. Мә wьра Хәбәра Хwәде бьһист у һьнге мәрʼа тьштәки рʼьнд бу. Гава мә һʼәбанд, шабун кʼәте дьле мә.
Һәр тьште мә һәбу, мала мә һәбу, дӧ зарʼед мә һәбун. Мә тʼьре әм дьжин, ле мә ньзаньбу, wәки әм бе Хwәде нә, әва нә әʼмьр ә. Паше рʼожәке әм диса чунә щьвине. Дӧ щара, се щара әм чун, рʼәʼма Хwәде мәрʼа вәбу. Мә дит, wәки әм wи әʼмьрида нажин, ча кӧ Хӧдан дьбежә - у мә тʼобә кьр.
Әва дәһә сал ә әм дьчьн щьвине. Әз шькьрийа хwә Хwәде тиньм, wәки Хwәде рʼастийа Хwә мәрʼа вәкьрийә. Әм тʼәзә заньн, wәки әм әʼмьр дькьн, чьмки бе Иса әʼмьр тʼӧнә бу. Мә дьжит, ле әм нава тәʼрийеда бун. Мә тʼьре әм qәнщ дьжин - әм баш дьжин, ле мә ньзаньбу, wәки әм һе рʼасти рʼастийа Хwәде нәһатьнә. Әз ньһа шькьрийа хwә wи Хwәдейи тиньм, кӧ чʼәʼве рʼӧһʼе мә вәкьрийә, wәки мә Хәбәра Wи нас кьрийә. Әм иро рʼийа Wида дьчьн.
Мә һьнге дәстпекьр сәва мьләте хwә зәʼф дӧа дькьр. Мә дьгот: «Йа Хӧдан, Тӧ мьләте мә wәрә рʼәʼме, бинә сәр рʼастийа Хwә.» Рʼожа иро әз шькьрийе дьдьмә Хwәде, wәки мьләте мә зәʼф вьра һәнә. Һʼәта се сьд, чар сьд мали һәнә. Ньһа зәʼф малада жи хwәденас һәнә. Шькьрийа хwә дьдьмә Хwәде. Мала Хwәде ава бә, сәва кʼәрәма Хwәде, wәки мәрʼа кьрийә.
Ньһа әм иди пе Хwәде дьжин, әм зәʼф ша нә. Әм һиви дькьн wәки кʼе ван хәбәра дьхунә, бәлки әw жи Wи Хӧдани бьгәрʼә у бьбинә. Чьмки әм дьл дьфькьрьн, тʼәне һесабун бьн ньге Хwәде йә. Бе Хwәде рʼе тʼӧнә, wәки бәндә һәрʼә, кӧ хьлаз бә. Шькьрийа хwә wи Хwәдейи тиньм. Мәсиһ тʼәв wә.
Ле әwед кӧ Әw qәбул кьрьн у баwәрийа хwә наве Wи анин,
Әwи да, кӧ һәqийа wан һәбә бьбьнә зарʼед Хwәде. Йуһʼ. 1:12
Әз тәʼл нәхwәш бум - жь xушка Тʼ.
Wәхтәки әз ӧса тәʼл нәхwәш бум, дьготьнә мьн: «Хwәде нас кә, те qәнщ би». Мьн дьгот, дәрәw ә. Мьн хушк-бьрайед хwәрʼа дьгот: «Һун дәрәwа дькьн». Ле wәхте мәрьв дькʼәвә тәнгасийе, әw ль Хwәде дьгәрʼә - у Хwәде рʼәʼм ә, Хwә wирʼа дьдә наскьрьн. Мала Хwәде ава бә. Хwәде мәзьн ә. Хwәде дәнге мәрийа дьбьһе. Хwәде мәрийа хьлаз дькә, хьлазбун тʼәне щәм Хwәде йә. Кʼе Иса нас кә, әwе хьлазийе бьбинә. Әwе аза бә.
Ижар, wәхте әз тәʼл нәхwәш кʼәтьм, кʼәтьмә нәхwәшхане. Тʼәмам доктора гӧман нәдьданә мьн, wәки әз бьжим, дьготьн:«Тӧ хьлаз наби». Ле һьнге гӧмана мьн сәр Хwәде бу. Мьн дьгот: «Хwәде дькарә мәрийа хьлаз кә. Һәр тьшт Хwәде дькарә, ль дәсте Хwәде йә. Һʼәму әʼрд у әʼзман Хwәде хӧльqандийә. Хwәде дькарә мәрийа хьлаз кә. Зәʼф тәʼл кʼәтьм.
Бьре мьн дьхwәст пе пʼәра мьн хьлаз кьра, ле Хwәде әз бе пʼәра хьлаз кьрьмә. Хwәде пʼәра нахwазә. Хwәде дьбе: «Кʼе бәрбь Мьн бе, Әзе wана хьлаз кьм. Кʼе мьн нас кә, әзе wана хьлаз кьм». Ләма мьн гази Иса кьр у гот: «Иса тӧ һʼәму тьшти зани у дьбини. Тә щьн алтʼ кьрийә. Әз бь наве Тә лавайа дькьм. Мьн хьлаз кә, әз нькарьм».
Мала Иса ава бә, Иса әз хьлаз кьрьм. Әз дәлава тәнгрʼа дәркʼәтьм. Әз шькьрийа хwә wи Хwәдейи тиньм, wәки ньһа әз дитьм. Әз тәʼл нәхwәш кʼәтьбум, мьн пешийе баwәр нәдькьр. Ле Хwәде мәзьн ә, wәки мәри гӧмана хwә дьдә сәр Хwәде. Иса хуна хwә бона мә рʼет. Хwәде кӧрʼе хwә тʼәне бона мә шанд, wәки кʼе баwәр кә хьлаз бә.
Ле бьре мьни мәзьн Иса qәбул накә. Дийа мьн шест сали бу. Бьре мьн дьготе: «Дийа мьн, тӧ гәрәке нәчи wе рʼеда. Әзе тәрʼа солед зерʼ бькʼьрʼьм, кʼьнщед зерʼ бькʼьрʼьм, тʼәне нәчә». Дийа мьн готе: «Кӧрʼе мьн, әз wәки бьмьрьм, әз qәт тьштәки жи хwәрʼа набьм. Һʼәта ньһа кʼе мьрийә хwәрʼа тьшт бьрийә». Wәхте дийа мьн чу рʼәʼме, әw чу щәм Хwәде. Мала Хwәде ава бә! Бәр мьрьне Исарʼа хәбәр дьда. Мә готе: «Ьне, тӧ чь дьбежи?» Әwе гот: «Иса һатийә, әзе һәрʼьм.» Әре, шькьр Хwәде бә! Гава баве мьн мьр, әм гәләки гьрийан у мәрʼа чәтьн бу, чьмки баве мә тʼобә нәкьри мьр. Ле гава дийа мә мьр, әм һаqаси бәр хwә нәкʼәтьн, чьмки дийа мә тʼобә кьрибу. Иса бәр дьле мәда дьһат. Әз заньм, ньһа чуйә щәм Хwәде, щәм Иса.
Wәки әм бьмьрьн, әме жи һәрʼьн wьр. Әз ньһа шькьрийа хwә Хwәде тиньм, wәки әм тʼәмам чьqас мьләт һәнә, бьра дьле хwә нәкьнә кәвьр. Бьра бьзаньбьн, кʼе рʼийа Иса бьгәрʼә, әwе хьлаз бә, һʼәта һʼәтайе хьлаз бә! Мала Wи ава бә, wәки әм дитьн. Әз Хӧдайе хwә рʼази мә. Әз зәʼф рʼази мә.
Хwәзи ль wи мәрьви, кӧ щерʼьбандьнада тәйах дькә, чьмки гава бь щерʼьбандьне рʼуспи дәре, әwе кʼофийа жийине бьстинә, кʼижан кӧ Хwәде wанрʼа соз дайә, йед кӧ Wи һʼьз дькьн. Нәʼма Аqуб 1:12
Мьн фәʼм нәдькьр, хwәденаси чь йә - жь xушка Кʼ.
Мьн һе Иса Мәсиһ qәбул нәкьрьбу. Мьн ньзаньбу, wәки Әw Хӧдане әʼрд у әʼзмен ә. Мьн фәʼм нәдькьр, wәки Хwәдейе рʼаст һәйә, кӧ дәнге мәрьва дьбьһе. Бона мә һʼәму тьшт кьрийә: дьнйа чекьрийә, әʼрд у әʼзман чекьрийә, һәwа, тәʼв, тʼәмам бь чекьрьна дәсте wи Хӧдани йә. Әм дьжин, ле мә шькьрийа хwә Wи нә дани. Әм нава тәʼрийеда бун. Мә ньзаньбу, wәки әw Хwәде мә хwәй дькә. Әм бәр пʼута, бәр тьштед майин та дьбун. Мә гази Хwәде дькьр, ле мә Хwәде нас нәдькьр.
Паше Хwәде чʼәʼве рʼӧһʼе мьн вәкьр. Рʼожәке әз чумә бажер мала бьре хwә. Жьна бьре мьн, бьре мьн, нәфәред хwәва бьбунә хwәденас. Ле мьн фәʼм нәдькьр, хwәденаси чь йә? Әз рʼожәке меванти чумә wе дәре, бука мьн дәфтʼәрәк ани да мьн, гот: «Әве дәфтʼәре бьхунә, пе ве дәфтʼәре бьжи, әва рʼастийа Хӧдан ә». Әз һатьмә мал, мьн дәфт'әр вәкьр, хwәнд, хwәнд, хwәнд. Әз фькьрим, wәки рʼасти әз нә әw мәри мә, кӧ дәфтʼәреда чь ньвисийә. Әз һәла һе нава гӧнада мә.
Һьнге Хwәде дьле мьн кʼәт, чʼәʼве рʼӧһʼе мьн вәкьр. Мьн Хwәде qәбул кьр у әз гәләки ша бум. Ле әз нәдьчумә щьвине, әм гӧндда дьман. Мьн ньзаньбу кʼидәре щьвин һәйә у зәʼф гәрʼийам. Мьн гот: «Әз гәрәке wи Хwәдейи рʼаст бьбиньм, wәки әʼрд у әʼзман хӧльqандийә. Паше әз диса щарәке чумә мала бьре хwә, тʼәв wан чумә щьвине. Мьн бьһист, wәки бьра тʼәмам Хәбәра Хwәде хәбәр дьдьн у дәфтʼәре дьхуньн, дьбежьн. Әз гьрийам у бәр Хwәде та бум, мьн тʼобә кьр у гот: «Хӧдан, әз жи гӧнәкʼар ьм. Мьн жи гәләк гӧнә кьрийә. Мьн жи дьзи кьрийә, мьн жи дәрәw кьрийә, мьн жи ньфьрʼ кьрийә, бадиһәwа.» Ле хәбәра Хwәде дьбе: «Гәрәке һун пироз бьн, ча Хӧдане wә пироз ә». Мьн тʼобә кьр. Мьн гӧмана хwә да сәр wи Хӧдайи.
Диса щарәке әз чумә мала бьре хwә у тʼәви wан чумә щьвине. Иди әw се, чар сал бу, кӧ мьн Хәбәра Хwәде бьһистьбу, ле һәла һе мьн Рʼӧһʼе Пироз нәстандьбу. Әз чум wе дәре, дьранед хwә чекьм. Дьранед мьн дешийан, мәһәке мала бьре хwәда мам. Һәр рʼо тʼәв wана дьчумә щьвине. Мә дӧа дькьр, гази Хӧдан дькьр. Рʼожәке жи щьвина мәзьн бу. Әм бьн дарада рʼуньштьбун, һавин-пайиз бу. Әм бьн дара рʼуньштьбун, мә щьвин дьбьһист, дӧа кьр. Һьнге Рʼӧһʼе Пироз һатә сәр мьн, әз гәләки ша бум. Рʼожа буйина чьл салийа мьн бу, хут wе рʼоже, әз пе Рʼӧһʼе Пироз һатьмә ньхӧмандьне. Әз гәләки ша бум, мьн шькьрийа хwә wи Хӧдайи ани, wәки Хwәде бәре Хwә да мьн, мьнрʼа гот:»Әзе тә хьлаз кьм, те бьби зарʼока мьн.» Әз гәләки ша бум. Шькьр наве Хwәде бә, wәки әз жи дитьм. Паше һьнге әз пе аве һатьмә ньхӧмандьне. Мьн Хwәде qәбул кьр. Әз дьжим пе wи Хӧдани, wәки әз хӧльqандьмә. Шькьр наве Wи бә һʼәзар щари, шькьр наве Wи бә. Амин.
Ле кʼи кӧ мьн бәр мәрьва иqрар кә, Әзе жи wи бәр Баве Хwәйи әʼзмана иqрар кьм. Мәтта 10:32
Щарәке мьн дьхwәст хwәха хwә бькӧшта - жь бьрайе Ш.
Әз дьхwазьм шәʼдәтийа хwә бьдьм, кӧ мьн ча тʼобә кьрийә у баwәрийа хwә наве Иса анийә.
Әз Әрмәнистанеда дьмам, мьн гәләк салед хwә wьр дәрбаз кьрьнә. Де у баве мьн гәләки дәст мьнда ащьз дьбун. Мьн бәр Хwәде гәләки гӧнә дькьрьн. Мьн малда гәләки шәрʼ дькьр. Әз ащьз дьбум жь әʼмьре хwә, ле мьн ньзаньбу, wәки Хwәде мьн дьгәрʼә.
Щарәке шәв, сьһʼәта чара, әз малда нибум, сәр qӧмбаре бум. Мьн тʼәв һәвале хwә шәв qӧмбар дьлист. Баве мьн һат, әз сәр qӧмбаре дитьм, гәләк һерс кʼәт, готә мьн: «Лаwо, гази Хwәде кә, бьра Хwәде тә бе рʼәʼме». Ле мьн гәләк щара гӧһ нәдьда хәбәра кал у баве хwә.
Чәнд сал дәрбаз бун, мьнрʼа гәләк әʼщеб бу, кӧ әз дьчумә бәр ощаха тʼәв де у баве хwә. Әз дьчумә мала шеха, мьн дьхwәст рʼасти нас кьра. Мьн дьхwәст бьзаньбуйа, кʼа рʼийа хьлазбуне? Рʼийа рʼастийе кʼижан ә? Һәйә Хwәде) Чьмки тʼәмам инсан дьбежьн Хwәде һәйә. Мьнрʼа жи фькьр дәрбаз дьбун, wәки әз Хӧдан нас кьм. Ле мьн тʼӧ щийи нькарьбу әw һесабун, рʼьһʼәти дьле хwәда бьдита.
Щарәке мьнрʼа готьн, wәки Хwәде дӧ һʼәзар сал пешда Кӧрʼе Хwә шандийә сәр ве дьне. Әw һатийә, кӧ тʼәмамийа инсана хьлаз кә. Әw һʼәму мьләта һʼьз дькә. Әwи бона һʼәмуйа хун рʼетийә. Һьнге мьн дәстпекьр, Кʼьтеба Пироз хwәнд. Ле мьнрʼа гәләки чәтьн бу, әз сәрwахт нәдьбум у мьн дӧа кьр: «Йа Хӧдан, wәки Тӧ һәйи, Тӧ мьн һʼьз дьки у нахwази әз ӧнда бьм, әз рʼәща дькьм, wәки Тӧ рʼастийа Хwә мьнрʼа вәки, кӧ әз бьн ви һʼӧкӧме хьраб аза бьм!»
Гәләк щара әз чумә щьвате. Мьн хәбәра Хwәде дьбьһист, ле мьн нькарьбу щи кьра сәре хwәда, чьмки Хәбәра Хwәде пе баwәрийе дьле инсенда вәдьбә. Рʼӧһʼе Пироз әwи шьхӧли дькә. Мьн жи гәләк гӧнә дькьрьн, мьн сәрһʼьшки дькьр, мьн гӧрʼа де у баве хwә нәдькьр. Мьн гәләк хьраби, дьзи кьрийә. Щарәке мьн дьхwәст хwәха хwә бькӧшта, хwә бавита чʼем. Ле дәнгәк нав мьнда гот: «Һе щаһьли, һʼәйфа тә, Хwәде тә һʼьз дькә!» Мьн wе рʼожеда Кʼьтеба Пироз хwәнд. Ле диса мьнрʼа чәтьн бу; әз нькарьбум жь һʼӧкӧме щьн хьлаз бума, жь wан гӧна аза бума. Ле рʼожәке әз һатьмә мал, мьн готә нәфәред хwә: «Әз нькарьм дәст жь щьхаре йан ичке бькʼьшиньм. Әз дьхwазьм, wәки Хwәдейе рʼаст мьн пироз кә, чьмки Хwәде пироз ә. Әз баwәр дькьм, wәки Хwәде мьн һʼьз дькә». Паше мьн Хәбәра Wи хwәндийә у мьн малда дӧа кьр тʼәв нәфәред хwә. Мьн лавайа Иса кьр: «Иса аликʼарийа мьн бькә». У Хwәде мьн һатийә рʼәʼме. Кал у бавед мә Иса нас нәкьрьбун, ле Әw мә дьгәрʼә у мә һʼьз дькә. Әw дьхwазә мә хьлаз кә. Әм гәләки тәʼристанийеда бун, ле шькьр бә наве Хӧдане мәрʼа, wәки әм рʼонайи кьрьн.
Иро әз зәʼф ша мә, тʼәв гәләк бьра, тʼәв гәләк хушка, тʼәв гәләк мьләта әз жи шькьрийа хwә Хwәде тиньм, wәки Wи әз жи аза кьрьмә. Ӧса жи әз дьхwазьм, wәки һәр кәсе кӧ сәр ве дьне дьжи, бьра бьхwазә у бьгәрʼә, wе Иса бьбинә. Гава кӧ һун Иса бьбиньн, һʼьшкәм Иса бьгьрьн, иди дури Иса нәкʼәвьн. Иса тʼәне рʼийа рʼастийе йә. Иса тʼәне инсен дькарә аза кә. Иса тʼәне дькарә малада тʼьфаq у һʼьзкьрьне бьдә, wәки инсан мала хwәда бе шәрʼ-дәʼw бьжи. Мьн дьле хwә да Иса. Шькьр бә наве Рʼәбе мьнрʼа, wәки әз аза кьрьм.
Әз иро дьхwазьм, wәки һун жи Кʼьтеба Пироз бьхуньн. Әw Мьзгинийа кӧ Хwәде мәрʼа шандийә, һун жи qәбул кьн. Бәле, һун баwәр кьн, кӧ Хwәде мә һʼьз дькә. Нава тʼәмам мьләтада Хwәде мьләте мә жи һʼьз дькә, Кʼӧрда, Езьдийа у ӧса жи һʼәму мьләта һʼьз дькә. Иро мала Wи ава бә, wәки мә жи дәнге Шьване Qәнщ бьһист.
Әм зәʼф рʼази нә жь Хӧльqдаре хwә, кӧ бона мә әw хьлазбун чекьр. Гәләк готьн һәнә, wәки әз бежьм, мьн гәләк тәнгаси дәрбаз кьрийә, чьмки мьн гәләк хьраби, гәләк нәһәqи дькьр. Ле мьн ньзаньбу, wәки Хwәде мьн дьгәрʼә. Рʼож һат кӧ Хwәде рʼәʼма Хwә мьн жи кьр.
Әз диса дьхwазьм бежьм, кӧ Хӧдан дӧ һʼәзар сал пешда һат, кʼәтә бьнйатʼа инсен, хwәха бу мәрьв. Әw сәр ве дьне 33 сала жит, кӧ әw Мьзгинийа qәнщ мәрʼа бьдә. Иса Мәсиһ мьрьн сәр хач алтʼ кьр, Мирещьн пʼепәс кьр, qийамәти станд у жь мьрьне рʼабу. Шькьр бә наве Хӧдане мә, Исайе Нуранирʼа. Амин.
Һәгәр әм бежьн: «Гӧне мә тʼӧнә», әм хwәха хwә дьхапиньн у рʼасти нава мәда тʼӧнә. Ле һәгәр әм гӧнед хwә бьдьнә рʼуйе хwә, Әw хwәйе созе Хwә йә у һәqийе дькә, wе гӧнед мә бьбахшинә у мә жь һʼәму нәһәqийа паqьж кә. 1 Йуһʼ.1:8-9
Һ’әму мәрьв дькарьн бьзаньбьн, Хwәде к’и йә.
